Ujian Praktek Bahasa Jawa SMA Kelas 12/XII Geguritan.

LINTANG SEMAPUT
Anggitane : Lina Kelana

Ben wengi lingsir, aku lungguh nang amben mangku kalkulator

Ngitungi lintang - lintang kang ambyar sak ambane jagad

Siji....loro....telu...papat...lima…enem…pitu…wolu…sanga

Tak itung nganti mripatku lamur

Cemlorot……….

Lintang nyunar nang sukma , ning geneya
Ana siji lintang, sunare riyep - riyep
kaya wong ora turu sepuluh dina

Ana apa kowe lintang ? Kabeh lintang padha sumringah bungah
Lha kok kowe layu ora duwe daya, Kenapa kowe lintang ?

Dak seleh kalkulator, Dak parani lintang kang siji kuwi
Mripatmu kena apa lintang ?

Mripatmu teles, kebanjiran kaya kali kunang
Dhadhamu mbredheli

Abang mongah - mongah
Kowe kenapa lintang ?

Lintang - lintang liyane nyedhak,

nguwasne aku, njur ngomong karo mbrabak !

Kowe isih takon kenapa ? Rungokno sira kabeh,
Kowe kowe, sing marakake lintang dadi kaya ngene,
Kowe, seneng ndhaguri kulit alus tanpa bolot,
Kowe sing mretheli tetanduran ijo royo royo,
Kowe kabeh ,sing royokan warisane sedulurmu,
Sing ngeruki ambegan - ambegan jroning bumi,
Ngodot lan nglempit ilat - ilat kang kepleset lathi
Kowe kabeh nyolong cahyaning lintang iki

O…., wong - wong kang ora duwe maesan
Elingana turumu amergo aku
Elinga, aku isa mateni isukmu

Eling...., eling...., eling lintange saiki semaput,
Ora iso sumringah, nggeguyu kaya biasane
Eling...., eling...., eling…. elingana.....
Lintang panjering wengi bakal mati kesikso lakon
Eling...., eling...., eling…. elingana.....
Balikna nyawane lintang sing kok pendhem jero nang lempitane bantalmu
Gage tangia, basuh luh kang mili deres nang plaluk’an mripate lintang

Gugah lintang ...Gugah lintang

Gugah lintang ... Gugah lintang ...  Gugah lintang
Supaya uripmu gemontang, lan kinormat dhuwur kaya lintang - lintang ning angkasa